បាងកក៖ តុលាការនៃប្រទេសថៃបានច្រានចោលសំណើរបស់អតីតនាយករដ្ឋមន្ត្រីថៃលោកថាក់ស៊ីន ស៊ីណាវ៉ាត្រា ក្នុងការធ្វើដំណើរទៅកាន់ទីក្រុងឌូបៃ ដើម្បីទទួលការព្យាបាល តុលាការថៃបញ្ជាក់ថា​​លោកអាចទទួលបានការថែទាំគ្រប់គ្រាន់ពីវេជ្ជបណ្ឌិតនៅក្នុងប្រទេសថៃ។

លោកថាក់ស៊ីន ដែលប្រឈមមុខនឹងការចោទប្រកាន់តាមមាត្រា ១១២ នៃក្រមព្រហ្មទណ្ឌច្បាប់ប្រ​​មាថព្រះមហាក្សត្រ បានដាក់ញត្តិកាលពីថ្ងៃទី ២៧ ខែកក្កដា ដើម្បីស្វែងរកការអនុញ្ញាត​ឱ្យចា​​កចេ​​ញពីប្រ​​ទេសថៃក្នុងការព្យាបាលជំងឺនៅឌូបៃ។ លោកបានស្នើសុំស្នា​ក់នៅប្រទេសអារ៉ាប់រួមចា​ប់ពីថ្ងៃទី ​១ ដល់ថ្ងៃទី ១៦ ខែសីហា ឆ្នាំ ២០២៤ ក៏ប៉ុន្តែសំណើររបស់លោកត្រូវបានតុលា​​ការថៃបដិសេធ។

យោងតាមតុលាការថៃបន្ទាប់ពីស្តាប់សក្ខីកម្មសាក្សី បានសម្រេចថា ស្ថានភាពសុខភាពរបស់លោក​ថាក់​ស៊ីន គឺជាជំងឺទូទៅដែលអាចព្យាបាលបានដោយគ្រូពេទ្យក្នុងស្រុក។ តុលាការក៏បានកត់សម្គាល់ផងដែ​រថាកិច្ចប្រជុំ​ផ្ទាល់ខ្លួនរបស់លោកនៅក្រៅប្រទេសមិនមានការចាំបាច់នោះទេ។

តុលាការបានសង្កត់ធ្ងន់ថាកាលបរិច្ឆេទនៃការធ្វើដំណើរដែលបានស្នើឡើងរបស់លោកថាក់ស៊ីនគឺជិតដល់ការពិនិត្យភស្តុតាងដែលបានគ្រោងទុកនៅថ្ងៃទី ១៩ ខែសីហា ឆ្នាំ ២០២៤។ ដោយមើលឃើ​ញកត្តាទាំងនេះ តុលាការបានចាត់ទុកថាវាមិនសមរម្យក្នុងការផ្តល់កា​រអនុញ្ញាតឲ្យលោ​កក្នុង​ការធ្វើដំណើរអន្តរជាតិនៅពេលនេះ៕