ថៃ៖ យ៉ាងហោចណាស់មនុស្សម្នាក់បានស្លាប់ និងជាច្រើននាក់ផ្សេងទៀតរងរបួស បន្ទាប់ពីកើតមាន​ហេតុកា​រណ៍ផ្ទុះនៅលើកប៉ាល់ដឹកប្រេងមួយគ្រឿង ។ហេតុការណ៍នេះ បានកើតឡើងកាលពីថ្ងៃអង្គារ នៅឯខេត្ត Samut Songkhramភាគនិរតីនៃរាជធានីបាងកក ប្រទេសថៃឡង់ដ៍ ។នេះបើតាមការចេ​ញផ្សាយរបស់សារព័ត៌មាន Reuters នៅថ្ងៃទី១៨ ខែមករា ឆ្នាំ២០២៣។

អាជ្ញាធរថៃបញ្ជាក់ថា  មនុស្សម្នាក់បានស្លាប់ និងកំពុងពិនិត្យតាមដានយ៉ាងយកចិត្តទុកដាក់ចំពោះ​អ្នករ​ងរបួស ១០នាក់ផ្សេងទៀតនៅក្នុងចំណោមអ្នកទាំង១៦នាក់ស្ថិតនៅលើកប៉ាល់ ខណៈក្រុមអ្នកជួយ​សង្គ្រោះកំពុងស្វែងរកអ្នកបាត់ខ្លួន ។ ក្រុមមន្ត្រីបានបន្ថែមថា មិនទាន់មានការបញ្ជាក់ណាមួយ​ពីប្រភពដើមនៃហេតុការណ៍ផ្ទុះនេះនៅឡើយទេ ។

យោងតាមការិយាល័យកាត់បន្ថយ និងបង្ការគ្រោះមហន្តរាយ បានឱ្យដឹងថា ជនរងគ្រោះភា​គច្រើន​ជា​ជាងផ្សា​ដែកមកពីប្រទេសមីយ៉ាន់ម៉ា ដែលកំពុងធ្វើ​​ការជួសជុលកប៉ាល់​​នៅមុនកើត​មាន​ហេតុការណ៍​ផ្ទុះនេះឡើង៕