ស្ថានភាពធាតុអាកាស នៅកម្ពុជាពីថ្ងៃទី៥ ដល់ ថ្ងៃទី៧ ខែវិច្ឆិកា នឹងទទួលរងឥទ្ធិពលប្រព័ន្ធសម្ពាធខ្ពស់ពីប្រទេសចិន រួមជាមួយខ្យល់មូសុងឦសានខ្សោយ
ភ្នំពេញ៖ ក្រសួងធនធានទឹក និងឧត្តុនិយម បានចេញសេចក្តីជូនដំណឹង ស្តីពី ស្ថានភាពធាតុអាកាស នៅព្រះរាជាណាចក្រកម្ពុជា (ចាប់ពីថ្ងៃទី០៥ ដល់ថ្ងៃទី០៧ ខែវិច្ឆិកា ឆ្នាំ២០២៣)៖ ប្រព័ន្ធសម្ពាធខ្ពស់ពីប្រទេសចិនលាតសន្ធឹងមកលើភាគខាងជើង និងភាគឦសាននៃប្រទេសកម្ពុជា រួមជាមួយខ្យល់មូសុងឦសានខ្សោយ។
ជាមួយគ្នានោះ រាជធានីភ្នំពេញ និងខេត្តមួយចំនួននៅភាគខាងត្បូង និងភាគអាគ្នេយ៍អាចមានភ្លៀងធ្លាក់ក្នុងកម្រិតពីមធ្យមទៅបង្គួរ លាយឡំ ជាមួយនឹងផ្គររន្ទះ គ្របដណ្ដប់លើផ្ទៃដីពី៣០-៤០%។ រីឯភាគពាយ័ព្យ និងភូមិភាគកណ្ដាលអាចមានភ្លៀងធ្លាក់ក្នុងកម្រិតពីតិច ទៅមធ្យម គ្របដណ្តប់លើផ្ទៃដីពី១០-២០%។
ទន្ទឹមនេះ ចរន្ដខ្យល់ក្ដៅហើយសើមនៃសមុទ្រចិនខាងត្បូងនឹងបក់ពីទិសខាងកើត និងទិសអាគ្នេយ៍មកលើប្រទេសកម្ពុជា។ ដោយឡែកនៅថ្ងៃទី៧ ប្រទេសកម្ពុជានឹងទទួលឥទ្ធិពលពីប្រព័ន្ធសម្ពាធខ្ពស់កម្រិតមធ្យមមួយទៀតពីប្រទេសចិន ដែលលាតសន្ធឹងដល់ភាគខាងជើង និងភាគឦសាននៃប្រទេសកម្ពុជា៕
