បាងកក៖ ប្រទេស​ថៃ​បាន​បណ្តេញ​មន្ត្រី​ប៉ូលិស​ម្នាក់​ក្នុង​ចំណោម​មន្ត្រី​ប៉ូលិស​ដែល​មាន​កេរ្តិ៍ឈ្មោះ​ និងមានតំណែងខ្ពស់​បំផុត​របស់​ប្រទេស ​ជុំវិញ​ការ​ជាប់​ពាក់​ព័ន្ធ​នឹង​ការ​លេង​ល្បែង​ស៊ីសង​ខុស​ច្បាប់​ និង​ការ​ក្លែង​បន្លំ​ប្រាក់។ នេះបើយោងតាមការចេញផ្សាយដោយសារព័ត៌មាន AFP ។

ប៉ូលីសថៃ បាននិយាយនៅក្នុងសេចក្តីថ្លែងការណ៍មួយថា លោក Surachate Hakparn ដែលគេហៅឈ្មោះក្រៅថា Big Joke មានតួនាទីជាអគ្គស្នងការរងនគរបាលនៃព្រះរាជាណាចក្រថៃ ត្រូវបានបណ្តេញចេញពីការងារជាផ្លូវការកាលពីថ្ងៃអង្គារ សប្ដាហ៍នេះ។

លោក Surachate ត្រូវគេចាប់ខ្លួន ក្នុងការវាយឆ្មក់ជាបន្តបន្ទាប់ក្នុងឆ្នាំ២០២៣ ដោយផ្តោតលើបណ្តាញល្បែងអនឡាញខុសច្បាប់ដែលមានឈ្មោះថា «Betflix» ព្រមទាំង​បទ​ចោទករណី លាង​លុយ​កខ្វក់ ហើយត្រូវបានផ្អាកពីការងារ នៅពេលការស៊ើបអង្កេត​កំពុង​ដំណើរការ ។

សូមបញ្ជាក់ថា ទម្រង់នៃការភ្នាល់ល្បែងភាគច្រើន គឺខុសច្បាប់នៅក្នុងប្រទេសថៃ ដោយអាជ្ញាធរបានខិតខំបិទកន្លែងលេងល្បែងស៊ីសងខុសច្បាប់ និងគេហទំព័រភ្នាល់ល្បែងអនឡាញជាច្រើន ដែលភាគច្រើនជាកម្មសិទ្ធិរបស់បរទេស៕