ភ្នំពេញ ៖សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានខេត្តព្រៃវែង និងបាត់ដំបង បានថ្លែងថា  សង្គ្រាមរវាង  រុស្ស៊ី -អ៊ុយក្រែន ព្រមទាំងការប្រែប្រួលអាកាសធាតុ  បានជះឥទ្ធិពលមកលើសេដ្ឋកិច្ច និងសង្គមកម្ពុជា។

ក្នុងកិច្ចប្រជុំផ្សព្វផ្សាយលទ្ធផលសន្និបាតវិសាមញ្ញរបស់គណៈកម្មាធិការកណ្ដាល ប្រារព្ធនៅទីស្នាក់ការគណបក្សប្រជាជនកម្ពុជា ខេត្តព្រៃវែង  នាថ្ងៃទី៣១  កក្កដា  នេះ  សម្ដេចក្រឡាហោម ស ខេង បានគូសបញ្ជាក់ជូនអង្គប្រជុំអំពីសភាពការណ៍សំខាន់ៗនៅជុំវិញពិភពលោក ក្នុងនោះរួមទាំងព័ត៌មានចំនួនពាក់ព័ន្ធនឹងសង្គ្រាមរវាងរុស្ស៊ី និងអ៊ុយក្រែន ការប្រែប្រួលអាកាសធាតុដែលនាំដល់ក្ដៅកង្វល់សម្រាប់ប្រជាពលរដ្ឋ ពិសេសកសិករ និងបញ្ហាមួយចំនួននៅតំបន់អាស៊ាន និងការជះឥទ្ធិពលមកលើសេដ្ឋកិច្ច និងសង្គមកម្ពុជា។

ពាក់ព័ន្ធនឹងការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីពេលថ្មីៗនេះ សម្ដេចក្រឡាហោម ស ខេង បានគូសបញ្ជាក់ជាថ្មីទៀតអំពីក្ដីប្រាថ្នាឱ្យទទួលបានជ័យជម្នះចំនួនពីរក្នុងពេលតែមួយ គឺជ័យឈ្នះក្នុងឋានៈជាគណបក្សកាន់អំណាចដែលត្រូវរៀបចំការបោះឆ្នោតនេះឱ្យប្រព្រឹត្តទៅដោយរលូននិងជោគជ័យ និងទី២គឺការទទួលបានជ័យជម្នះរបស់គណបក្សប្រជាជនកម្ពុជានៅក្នុងការប្រកួតប្រជែងការបោះឆ្នោតនេះ។ សម្ដេចក្រឡាហោម បានបង្ហាញមោទកភាពសម្រាប់ការទទួលបានជ័យជម្នះទាំងពីរនេះ។

នាឱកាសនោះដែរ សម្ដេចក្រឡាហោម ស ខេង ក៏បានមានប្រសាសន៍ជំរុញឱ្យសមាជិក សមាជិការគណបក្សដែលជាប់ឆ្នោតជាក្រុមប្រឹក្សាឃុំ សង្កាត់ ត្រូវរួមគ្នាពង្រឹងការបំពេញតួនាទី ភារកិច្ចឱ្យបម្រើប្រជាពលរដ្ឋឱ្យបានល្អ ក្នុងនោះត្រូវយកចិត្តទុកដាក់រៀបចំផែនការអនុវត្តរយៈពេល៥ឆ្នាំ ពីឆ្នាំ២០២២ដល់ឆ្នាំ២០២៧ ដើម្បីដាក់ក្នុងកិច្ចប្រជុំក្រុមប្រឹក្សាពិភាក្សាគ្នានិងសម្រេច។ សម្ដេចក៏បានជំរុញឱ្យខិតខំយកចិត្តទុកដាក់ដោះស្រាយក្ដីកង្វល់ សំណើរ សំណូមពរ និងបញ្ហាប្រឈមរបស់ប្រជាពលរដ្ឋឱ្យបានឆាប់រហ័ស និងប្រកបដោយប្រសិទ្ធភាពផងដែរ៕EB