បុរសពីរនាក់ត្រូវសត្វខ្លាឃ្មុំទះ និងចាប់ហែក បណ្តាលឱ្យរងរបួសធ្ងន់ ក្នុងពេលធ្វើដំណើរទៅដួសត្រីកណ្តាលព្រៃក្នុងភូមិសាស្ត្រឃុំអូរសោម ខេត្តពោធិ៍សាត់
(ពោធិ៍សាត់)៖ បុរសពីរនាក់ ក្នុងនោះម្នាក់ជាប្រជាការពារភូមិ ត្រូវបានសត្វខ្លាំឃ្មុំទះ និងចាប់ហែកបណ្តាលឱ្យរងរបួសធ្ងន់ ខណៈកំពុងធ្វើដំណើរចេញទៅដួសត្រីកណ្តាលព្រៃ ស្រាប់តែប្រទះឃើញសត្វខ្លាឃ្មុំ នៅកណ្តាលផ្លូវ។ហេតុការណ៍ខាងលើនេះ បានកើតឡើងនា ថ្ងៃទី០៤ ខែកក្កដា ឆ្នាំ២០២២ នៅចំណុចឆាយបីជាន់ ឧបសម្ព័ន្ធស្ទឹងតាចាន់ ស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់។
បើតាមការបញ្ជាប់របស់ សមត្ថកិច្ចប៉ុស្តិ៍នគរបាលរដ្ឋបាលអូរសោម បានឱ្យដឹងថា ជនរងគ្រោះទាំងពីរនាក់នេះ មានឈ្មោះ ងុយ ងឿន ភេទប្រុស អាយុ៣៣ ឆ្នាំ ជនជាតិខ្មែរ ជាប្រជាការពារភូមិ (រងរបួសធ្ងន់)និងឈ្មោះ ភី ភក្តី ភេទប្រុស អាយុ២៩ឆ្នាំ ជនជាតិខ្មែរ (រងរបួសធ្ងន់) ទាំងពីរនាក់រស់នៅចំណុចឧបសម្ព័ន្ធស្ទឹងតាចាន់ ក្នុងភូមិឆាយលូក ឃុំអូរសោម ស្រុកវាលវែង។
ប្រភពបានបន្ថែមថា មូលហេតុ ដែលមានករណីខាងលើនេះ គឺដោយសារជនរងគ្រោះទាំងពីរនាក់ ចេញទៅដួសត្រីនៅចំណុចឆាយបីជាន់ ពេលកំពុងតែធ្វើដំណើរស្រាប់តែប្រទះជួបសត្វខ្លាឃ្មុំ នៅកណ្តាលផ្លូវតែម្តង។បច្ចុប្បន្នជនរងគ្រោះទាំងពីរនាក់ ត្រូវបានបញ្ជូនទៅសង្គ្រោះបន្ទាន់ នៅគ្លីនិចឯកជន ក្នុងឃុំអូរសោម ស្រុកវាលវែង ខេត្តពោធិ៍សាត់៕
