ហ្ស៊េរុយសាឡិម៖ កងទ័ពអ៊ីស្រាអែលនិយាយថា អាវុធមួយចំនួនដែលក្រុមហាម៉ាស់ប្រើ ក្នុងការវាយប្រហារ កាលពីថ្ងៃទី៧ ខែតុលា ឆ្នាំ២០២៣ កន្លងទៅ ត្រូវបានផលិត នៅក្នុងប្រទេសអ៊ីរ៉ង់ ឬ កូរ៉េខាងជើង។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃទី ២៧ តុលា ២០២៣។

យោធាអ៊ីស្រាអែលបានធ្វើសេចក្តីថ្លែងការណ៍បែបនេះ ក្នុងអំឡុងពេលដំណើរទស្សនកិច្ចរបស់ក្រុមអ្នកសារព័ត៌មាន នៅទីតាំងបង្ហាញអាវុធជាច្រើនប្រភេទ ដែលរឹបអូសបានពីសហគមន៍ នៅភាគខាងត្បូងអ៊ីស្រាអែល ជាតំបន់ដែលត្រូវបានវាយប្រហារ ដោយពួកសកម្មប្រយុទ្ធ ហាម៉ាស់ កាលពីថ្ងៃទី៧ ខែតុលា។

គ្រាប់មីនជាច្រើនគ្រាប់, គ្រាប់បែកដៃដែលបាញ់ដោយរ៉ុក្កែត ហៅកាត់ថា RPGs និងយន្តហោះគ្មានមនុស្សបើក ដែលផលិតក្នុងស្រុក គឺជាផ្នែកមួយ នៃការដាក់តាំងបង្ហាញអាវុធ នាពេលនោះ។ មន្ត្រីយោធាអ៊ីស្រាអែល បាននិយាយថា «ខ្ញុំគិតថា ប្រហែលចន្លោះពី ៥ ទៅ ១០ ភាគរយ នៃអាវុធ នៅទីនេះ ត្រូវបានផលិត នៅក្នុងប្រទេសអ៊ីរ៉ង់» ។

មន្ត្រីរូបនេះបានបន្ថែមទៀតថា «ហើយ ១០ភាគរយទៀត ត្រូវបានផលិត នៅកូរ៉េខាងជើង។ នៅសល់ប៉ុន្មានទៀត ត្រូវបានផលិត នៅក្នុងតំបន់ Gaza Strip ផ្ទាល់»។ ក្រុមហាម៉ាស់ត្រូវបានគេជឿថា កំពុងពឹងផ្អែកលើបណ្តាញរត់ពន្ធយ៉ាងទូលំទូលាយ ដើម្បីនាំយកអាវុធ ចូលទៅក្នុងតំបន់ Gaza Strip ។

គួររម្លឹកថា កាលពីថ្ងៃទី ៧ ខែតុលា ក្រុមហាម៉ាស់បានវាយប្រហារសម្រុលចូលទៅក្នុងប្រទេសអ៊ីស្រាអែល ដ៏គួរឲ្យភ្ញាក់ផ្អើល សម្លាប់មនុស្សជាង ១៤០០ នាក់ ដែលភាគច្រើន គឺជាជនស៊ីវិល ព្រមទាំង បានចាប់ជំរិតមនុស្ស ចំនួន២២៤នាក់ បន្ថែមទៀត។

លើពីនេះទៅទៀត អ៊ីស្រាអែលបានសងសឹកវិញ ជាមួយនឹងការវាយប្រហារ ឥតឈប់ឈរ។ ក្រសួងសុខាភិបាលហ្គាហ្សា គ្រប់គ្រងដោយក្រុមហាម៉ាស់ បាននិយាយថា ការសងសឹកនេះបានសម្លាប់មនុស្សជាង ៧០០០ នាក់ហើយ ដោយក្នុងនោះ ភាគច្រើនគឺជាជនស៊ីវិល។ ចំនួនអ្នកស្លាប់ត្រូវបានបារម្ភថា នឹងកើនឡើងច្រើនទៀត ប្រសិនបើទាហានអ៊ីស្រាអែលដែលប្រមូលផ្តុំ នៅជិតព្រំដែន ផ្លាស់ទីចូល ទៅក្នុងទឹកដីប៉ាឡេស្ទីន៕RT