កំពង់ឆ្នាំង ៖ ប្រជាពលរដ្ឋរស់នៅភូមិខ្លាគ្រហឹម ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង បានសម្ដែងក្តីរីករាយជាខ្លាំង ក្រោយទទួលបានអំពូលភ្លើងសូឡាពីសប្បុរជន សម្រាប់បំភ្លឺនៅតាមដងផ្លូវ និងបរិវេណសាលាបឋមសិក្សា និងអនុវិទ្យាល័យខ្លាគ្រហឹម។

នៅព្រឹកថ្ងៃទី ២៤ ខែតុលា ឆ្នាំ២០២៤នេះ ដោយមានវត្តមានរបស់ក្រុមប្រឹក្សាឃុំ ,មេឃុំ ,មេភូមិ ,គណៈកម្មាធិការភូមិ ,ចាស់ព្រឹទ្ធាចារ្យ ,លោកនាយកសាលាបឋមសិក្សា/អនុវិទ្យាល័យខ្លាគ្រហឹម និងសិស្សានុសិស្ស ក្នុងមូលដ្ឋានភូមិខ្លាគ្រហឹម ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង បានរៀបចំពិធីទទួល និងដំឡើងអំពូលសូឡា នៅតាមដងផ្លូវ និងបរិវេណសាលាបឋម/អនុវិទ្យាល័យខ្លាគ្រហឹម ដែលជាអំណោយដ៏ថ្លៃថ្លារបស់ ៖ ឯកឧត្តម ឧត្តមសេនីយ៍ទោ អ៊ីវ វាសនា និងលោកជំទាវ, លោកវរសេនីយ៍ទោ ហេង ច័ន្ទសុជាតិ និងលោកស្រី, លោកវរសេនីយ៍ទោ ខុន ប៊ុនធា និងលោកស្រី។

អំណោយដ៏ថ្លៃថ្លា ដែលរួមមានអំពូលសូឡា និងបង្គោលដំឡើងសូឡា នាពេលនេះ គឺបានឆ្លុះបញ្ចាំងពីការចូលរួមក្នុងការអភិវឌ្ឍនមូលដ្ឋានភូមិខ្លាគ្រហឹម ក៏ដូចជាចូលរួមក្នុងការលើកកម្ពស់គោលនយោបាយភូមិ ឃុំសង្កាត់ មានសុវត្ថិភាព ,សម្រួលការធ្វើចរាចរណ៍របស់ប្រជាពលរដ្ឋ ហើយក៏ដើម្បីបង្កើនសោភ័ណភាពនៅក្នុងបរិវេណសាលាបឋម/អនុវិទ្យាល័យខ្លាគ្រហឹម។ 

ជាការឆ្លើយតបនិងទឹកចិត្តដ៏ថ្លៃថ្លានេះ លោកមេឃុំអំពិលទឹក ,លោកមេភូមិខ្លាគ្រហឹម , នាយកបឋម/អនុវិទ្យាល័យខ្លាគ្រហឹម និងប្រជាពលរដ្ឋនូវមូលដ្ឋានភូមិខ្លាគ្រហឹមទាំងមូលបានបង្ហាញក្តីរីករាយ និងសម្តែងការអបអរសាទររួមគ្នា ដោយបានទទួលនូវសមទ្ធិផលថ្មី សម្រាប់បំរើអោយផលប្រយោជន៍រួមក្នុងភូមិសាស្ត្រភូមិខ្លាគ្រឹហឹម។

អង្គពិធីទាំងមូល ក៏បានធ្វើការកត់សម្គាល់ដូចគ្នាថា នេះគឺជាលើកទី១ហើយ ដែលភូមិខ្លាគ្រហឹម ក៏ដូចជាឃុំអំពិលទឹក បានទទួលអំណោយជាអំពូលសូឡាដាក់បំភ្លឺផ្លូវ ក្នុងបរិវេណទីកន្លែងសិក្សាអប់រំ បែបនេះ។ 

ជាថ្មីម្តងទៀត ក្រុមប្រឹក្សាឃុំ, មេឃុំ, មេភូមិ, ប្រជាពលរដ្ឋ និងសិស្សានិសិស្ស បានថ្លែងអំណរគុណ ជូនចំពោះ ឯកឧត្តម ឧត្តមសេនីយ៍ទោ អ៊ីវ វាសនា និងលោកជំទាវ ព្រមទាំងសហការី ដែលបានផ្តល់នូវអំណោយដ៏ថ្លៃថ្លានេះ៕