តូក្យូ៖ អ្នកនាំពាក្យរបស់រដ្ឋាភិបាលរបស់ប្រទេសជប៉ុន បាននិយាយកាលពីថ្ងៃពុធថា ប្រទេសជប៉ុនបានប្រាប់ប្រទេសចិនថា ការរំលោភលើដែនអាកាសរបស់ខ្លួនដោយប្រើប្រាស់ប៉េងប៉ោងឃ្លាំមើលដែលគ្មានអ្នកបើកគឺពិតជាមិនអាចទទួលយកបាននោះទេ។

ក្រសួងការពារជាតិជប៉ុនបាននិយាយកាលពីថ្ងៃអង្គារថា ខ្លួន "សង្ស័យយ៉ាងខ្លាំង" ប៉េងប៉ោងឃ្លាំមើលចិនបានចូលទឹកដីជប៉ុនយ៉ាងហោចណាស់ ៣ ដង ចាប់តាំងពីឆ្នាំ ២០១៩ មក ។

ជាក់ស្តែង ប្រធានលេខាធិការខុទ្ទកាល័យ លោក Hirokazu Matsuno បានប្រាប់អ្នកយកព័ត៌មានថា "ជាលទ្ធផលនៃការស៊ើបអង្កេតបន្ថែមទៀតនៃវត្ថុហោះរាងដូចប៉េងប៉ោងដែលត្រូវបានបញ្ជាក់នៅក្នុងដែនអាកាសរបស់ប្រទេសជប៉ុននាពេលកន្លងមក វាត្រូវបានគេសង្ស័យយ៉ាងខ្លាំងថា វាជាប៉េងប៉ោងឃ្លាំមើលគ្មានមនុស្សបើកពីប្រទេសចិន" ។

ជាមួយគ្នានេះដែរ ទីភ្នាក់ងារសារព័ត៌មាន Kyodo បានរាយការណ៍កាលពីថ្ងៃពុធថា រដ្ឋាភិបាលរបស់ប្រទេសជប៉ុនកំពុងពិចារណាលើការបន្ធូរបន្ថយសម្រាប់តម្រូវការលើការប្រើប្រាស់អាវុធដើម្បីការពារប្រឆាំងនឹងការឈ្លានពានដែនអាកាសរបស់ខ្លួន។

គួរបញ្ជាក់ថា ការយកចិត្តទុកដាក់ចំពោះការឈ្លានពាននាពេលកន្លងមកនៃដែនអាកាសរបស់ប្រទេសជប៉ុនបានកើនឡើងចាប់តាំងពីសហរដ្ឋអាមេរិកបានបាញ់ទម្លាក់ប៉េងប៉ោងរបស់ចិននៅក្នុងខែនេះ ហើយបានពន្យល់ប្រាប់មន្ត្រីមកពីប្រទេសចំនួន ៤០ អំពីវត្ថុនោះ។ NR