តូក្យូ៖ ក្រសួងកសិកម្មបាននិយាយកាលពីថ្ងៃពុធថា ប្រទេសជប៉ុនបានរកឃើញការផ្ទុះឡើងនៃជំងឺផ្តាសាយបក្សីជាលើកដំបូងរបស់ខ្លួនសម្រាប់រដូវរងាឆ្នាំ ២០២១ ជាមួយនឹងការបញ្ជាក់ពីករណីនៃ "ជំងឺគ្រុនផ្តាសាយបក្សីដែលបង្កជំងឺខ្លាំង" នៅកសិដ្ឋានបសុបក្សីនៅភាគឦសាននៃប្រទេស។

ក្រសួងបាននិយាយនៅក្នុងសេចក្តីថ្លែងការណ៍នៅលើគេហទំព័ររបស់ខ្លួនថា សត្វមាន់ចិញ្ចឹមយកពងប្រហែល ១៤៣.០០០ក្បាល កំពុងត្រូវបានសម្លាប់នៅកសិដ្ឋានក្នុងទីក្រុង Yokote ក្នុងខេត្ត Akita ដោយបន្ថែមថា បរិវេនតំបន់ហាមឃាត់រហូតដល់ ១០ គីឡូម៉ែត្រ (៦,២ ម៉ាយល៍) ពីកន្លែងដែលកើតឡើងនេះ។

ក្រសួងបាននិយាយទៀតថា "ក្រោមស្ថានភាពបច្ចុប្បន្ននៅក្នុងប្រទេសជប៉ុន យើងមិនជឿថាមានលទ្ធភាពណាមួយនៃជំងឺគ្រុនផ្តាសាយបក្សីឆ្លងមកមនុស្សតាមរយៈការបរិភោគសាច់មាន់ ឬស៊ុតនោះទេ"។ ប៉ុន្តែការកើនឡើងនៃចំនួនមនុស្សនៅក្នុងប្រទេសចិនដែលបានឆ្លងជំងឺគ្រុនផ្តាសាយបក្សីនៅឆ្នាំនេះកំពុងក្លាយជាប្រភពនៃក្តីបារម្ភក្នុងចំណោមអ្នកជំនាញខាងរោគរាតត្បាត ជាពិសេសនៅពេលដែលពិភពលោកបានធូរស្រាលបន្តិចម្តងៗពីជំងឺរាតត្បាតកូវីដ ១៩។

ប្រទេសចិនបានរាយការណ៍ពីការឆ្លងមេរោគមនុស្សចំនួន ២១ នាក់ជាមួយប្រភេទរងនៃជំងឺផ្តាសាយបក្សី H5N6 ក្នុងឆ្នាំ ២០២១ ទៅអង្គការសុខភាពពិភពលោក បើធៀបនឹងឆ្នាំមុនមានតែ ៥ នាក់ប៉ុណ្ណោះ ដោយមានមនុស្ស ៦ នាក់បានស្លាប់ និងជាច្រើននាក់ទៀតមានជំងឺធ្ងន់ធ្ងរ។

ការផ្ទុះឡើងនៃជំងឺគ្រុនផ្តាសាយបក្សីក៏ត្រូវបានរាយការណ៍ផងដែរនៅក្នុងប៉ុន្មានថ្ងៃ និងសប្តាហ៍ថ្មីៗនេះនៅក្នុងទ្វីបអឺរ៉ុប ជាមួយនឹងកសិដ្ឋានក្នុងប្រទេសប៉ូឡូញ ដែលជាទីតាំងចុងក្រោយបំផុតសម្រាប់ការឆ្លង ដែលសរុបមានសត្វបក្សីចំនួន ៦៥០.០០០ ក្បាល។

គួររំលឹកថា កាលពីរដូវរងាឆ្នាំមុន ប្រទេសជប៉ុនមានរដូវដ៏អាក្រក់បំផុតរបស់ខ្លួននៃជំងឺផ្តាសាយបក្សីនៅក្នុងកសិដ្ឋាន ដោយមានសត្វមាន់ជាង ៣លានក្បាល ត្រូវបានសម្លាប់ និងមួយភាគបួននៃខេត្តរបស់ប្រទេសនេះរងផលប៉ះពាល់។ ជាក់ស្តែង ប្រទេសជប៉ុនមានហ្វូងមាន់ចិញ្ចឹមយកពងប្រមាណ ១៨៥ លានមេមាន់ និងចិញ្ចឹមយកសាច់ប្រមាន ១៣៨ លានក្បាល នេះបើយោងតាមទិន្នន័យរបស់ក្រសួងកសិកម្ម។ NR