(បរទេស)៖ ទីក្រុងវ៉ាស៊ីនតោន បានចាត់តាំងក្រុមយោធាឯកជនរបស់រុស្ស៊ីឈ្មោះ Wagner ថាជា អង្គការឧក្រិដ្ឋកម្មឆ្លងដែន ដោយលើកឡើងពីទំនាក់ទំនងអាវុធ របស់ក្រុមនេះជាមួយទីក្រុងព្យុងយ៉ាង ដោយរំលោភលើសេចក្តីសម្រេច របស់ក្រុមប្រឹក្សាសន្តិសុខ អង្គការសហប្រជាជាតិ។នេះបើយោងតាមសារព័ត៌មាន The Moscow Times ចេញផ្សាយកាលពីថ្ងៃទី៣០ ខែមករា ឆ្នាំ២០២៣។

សេតវិមានបានបង្ហាញរូបថត ដែលបានមកពីការស៊ើបការណ៍សម្ងាត់ របស់សហរដ្ឋអាមេរិកអំពី រថភ្លើងរបស់រុស្ស៊ីដែលចូលមក ប្រទេសកូរ៉េខាងជើង ដោយបានផ្ទុកគ្រាប់រ៉ុក្កែត និងមីស៊ីល ហើយត្រឡប់ទៅប្រទេសរុស្ស៊ីវិញ, នេះបើយោងតាមអ្នកនាំពាក្យ សន្តិសុខជាតិរបស់អាមេរិក គឺលោក John Kirby ។

យ៉ាងណាក៏ដោយ កូរ៉េខាងជើង បានបដិសេធ ការផ្តល់អាវុធដល់ទីក្រុងមូស្គូ ។នៅក្នុងសេចក្តីថ្លែងការណ៍ដែល ធ្វើឡើងដោយទីភ្នាក់ងារ សារព័ត៌មានកណ្តាលកូរ៉េ, មន្ត្រីជាន់ខ្ពស់កូរ៉េខាងជើងបាន ច្រានចោលការចោទប្រកាន់នេះ ដោយព្រមានថា សហរដ្ឋអាមេរិកនឹងប្រឈមមុខនឹង “លទ្ធផលដែលមិនចង់បាន” ប្រសិនបើអាមេរិកនៅតែបន្តផ្សព្វផ្សាយ “ពាក្យចចាមអារ៉ាមដែល បង្កើតដោយខ្លួនឯងបែបនេះ” ៕