ម៉ាឡេស៊ី៖ យោងតាមនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសកា លពី ពេលថ្មីៗនេះថា រដ្ឋាភិបាលរបស់លោក គ្រោងនឹងដាក់ចេញនូវបទប្បញ្ញត្តិមួយចំនួន ដើម្បីគ្រប់គ្រងលើដំណើរការបច្ចេកវិទ្យាបញ្ញាសិប្បនិម្មិត AI និងការផ្តល់សេវា  កម្មទិន្នន័យតាមបណ្តាញអ៊ីនធើណេត (Cloud) ដើម្បីធានាលើកកម្ពស់ក្រ មសីលធ ម៌វិជ្ជាជីវៈក្នុងការប្រើប្រាស់។

ការប្រកាសរបស់លោកនាយករដ្ឋមន្រ្តី អ៊ីប្រាហ៊ីមខាងលើនេះ ធើ្វឡើងក្រោយមានក្រុមហ៊ុនបច្ចេកវិទ្យាធំៗលើពិភពលោកជាច្រើន នាំគ្នាសម្រុកវិនិយោគនៅម៉ាឡេស៊ី ក្នុងរយៈពេលជាងមួយឆ្នាំចុងក្រោយ ដើម្បីប្រកួតប្រជែងទីផ្សារផ្នែកសេវាកម្មទិន្នន័យតាមបណ្តាញអ៊ីនធើណេត តាមរយៈគម្រោងសាងសង់ហេដ្ឋារចនាសម្ព័ន្ធសំខាន់ៗ រួមមានមជ្ឈមណ្ឌលគ្រប់គ្រងទិន្នន័យដើម្បីដំណើរការសេវាកម្ម (Cloud) រួមទាំងកម្មវិធីស្វ័យប្រវត្តិនានាដែលគ្រប់គ្រងដោយ AI។

ជុំវិញសន្ទុះនៃតម្រូវការទិន្នន័យតាមបណ្តាញអ៊ីនធើណេតនេះ ត្រូវបានលោក អ៊ីប្រាហ៊ីម លើកយកចំណុចគោលសំខាន់ៗចំនួន ៤ ដែលនឹងត្រូវធើ្វការគ្រប់គ្រងដោយច្បាប់ រួមមាន៖ ការច្នៃប្រឌិតនិងប្រសិទ្ធភាពសេវាទិន្នន័យសាធារណៈ ការអភិវឌ្ឍន៍និងប្រកួតប្រជែងផ្នែកសេដ្ឋកិច្ច ការពង្រឹងទំនុកចិត្តអ្នកប្រើប្រាស់និងសុវត្ថិភាពទិន្នន័យ និងការលើកកម្ពស់សិទ្ធិអំណាចរបស់ពលរដ្ឋតាមរយៈបរិយាបន្នឌីជីថល។

ពាក់ព័ន្ធនឹងរឿងនេះ លោក អ៊ីប្រាហ៊ីម បានបញ្ជាក់បន្ថែមថា លោកនឹងបង្កើតការិយាល័យជាតិថ្មីមួយសម្រាប់កិច្ចការ AI ដែលមានតួនាទីធើ្វការសម្របសម្រួលលើគម្រោងគំនិតផ្តួចផ្តើមនានា រួមមានភារកិច្ចស្នូលក្នុងការរៀបរៀងបង្កើតបទប្បញ្ញត្តិសម្រាប់គ្រប់គ្រងលើវិស័យបច្ចេកវិទ្យា ដើម្បីបង្កើនការយល់ដឹងពីក្រមសីលធម៌វិជ្ជាជីវៈ និងធានានិរន្តរភាពក្នុងដំណើរការអភិវឌ្ឍន៍និងប្រើប្រាស់ AI នៅក្នុងរយៈពេល ១២ខែខាងមុខ៕