តាកែវ ៖ ក្នុងឱកាសចុះជួបសំណេះសំណាល ជាមួយមន្រ្តីពាក់ព័ន្ធនានា ដែលប្រចាំការនៅច្រកទ្វារអន្តរជាតិភ្នំដិន នៅរសៀលថ្ងៃព្រហស្បត្ត៍ ទី ២២ ខែ ឧសភា ឆ្នាំ ២០២៥នេះ លោក វ៉ី សំណាង អភិបាលខេត្តតាកែវ បានធ្វើការ ណែនាំដល់មន្រ្តីពាក់ព័ន្ធទាំងអស់ ត្រូវធ្វើយ៉ាងណាទប់ស្កាត់អោយបានជាដាច់ខាតការនាំបន្លែផ្លែឈើ មានសារធាតុគីមី ចូលមកកាន់ទីផ្សារប្រទេសកម្ពុជាតាមច្រកទ្វារភ្នំដិន ជាពិសេសផ្លែទូរេននៅប្រទេសវៀតណាម ដែលកំពុងតែមានបញ្ហា ប៉ះពាល់ដល់សុខភាព។

លោក អភិបាលខេត្ត បានថ្លែងបន្តថា ច្រកទ្វាអន្តរជាតិភ្នំដិន គឺជាច្រកទ្វារដ៍ធំមួយ ដែលនាំទំនិញពីកម្ពុជា ទៅវៀតណាមនិងនាំទំនិញពីប្រទេសវៀតណាមចូលមកកម្ពុជាយើងជាពិសេសបន្លែផ្លែឈើជាច្រើនបាននាំពីប្រទេសវៀតណាមចូលតាមច្រកនេះមកផ្គត់ផ្គង់ទីផ្សារប្រទេសកម្ពុជា។

លោក អភិបាលខេត្ត ថា «ដូច្នោះមន្រ្តីពាក់ព័ន្ធនានាប្រចាំការនៅច្រកទ្វារភ្នំដិននេះ ត្រូវពិនឹត្យរកសាធាតុគីមីជាមុនសិន មុននឹងអនុញ្ញាតិឲ្យនាំបន្លែផ្លែឈើចូល បើរកឃើញមានសាធាតុគីមី នៅលើបន្លែផ្លែ ឈើប៉ះពាល់សុខភាពអ្នកទទួលទាន ត្រូវតែហាមឃាត់ដាច់ខាត មិនអោយនាំចូលមកកាន់ទីផ្សារនៅក្នុងប្រទេសកម្ពុជា យើងនោះទេ ជាពិសេសផ្លែទូរេនរបស់ប្រទេសវៀតណាម គឺត្រូវហាមខាត់ដាច់មិនឲ្យនាំចូលតែម្ដង»។

ក្នុងឱកាសនោះ លោកអភិបាលខេត្តតាកែវ ក៏បានធ្វើការណែនាំដល់មន្រ្តីចត្តឡីស័ក្ដ ដែលប្រចាំ នៅ ច្រកទ្វារអន្តរជាតិភ្នំដិន ត្រូវធ្វើត្រួតពិនិត្យសុខភាព អ្នកដំណើរឆ្លងកាត់ចូលមកប្រទេសកម្ពុជា អោយបានច្បាស់លាស់ ព្រោះបច្ចុប្បន្នជំងឺកូវីដ១៩ កំពុងតែផ្ទុះឡើងសារជាថ្មីនៅប្រទេសក្បែរខាងយើង ហើយបើពិនិត្យរកឃើញភាព មិនប្រក្រតី ណាមួយត្រូវរាយការណ៍បន្ទាន់ទៅថ្នាក់លើដើម្បីចាត់វិធានការណ៍ទប់ស្កាត់អោយបានទាន់ពេលវេលា៕