ប្រជាពលរដ្ឋខ្មែរជាង ៥លាននាក់ ខ្ចីប្រាក់ពី «គ្រឹះស្ថានហិរញ្ញវត្ថុ» ខេត្តខ្ចីច្រើនជាងគេគឺភ្នំពេញ ខេត្តកណ្តាល និង ខេត្តសៀមរាប
ភ្នំពេញ៖ ប្រជាពលរដ្ឋខ្មែរប្រមាណ ៥.០៤លាននាក់ នៅក្នុង២៥ រាជធានី-ខេត្ត ដោយមានរាជធានីខេត្តចំនួន៣ មានបរិមាណឥណទាន ច្រើនជាងគេរួមមាន៖ រាជធានីភ្នំពេញ ខេត្តកណ្តាល និងខេត្តសៀមរាប បានផ្តល់ឥណទានប្រហែល ៦០% នៃសមតុល្យឥណទានសរុប។ នេះបើយោងតាមរបាយការណ៍របស់ការរិយាល័យព័ត៌មានឥណទាន (CBC)។
យោងតាម CBC សមតុល្យឥណទាននៅក្នុងឆ្នាំ២០២៤នេះ មានចំនួនសរុប ២៣៦,៤២៩,២៦៦ លានរៀល។ រាជធានីភ្នំពេញ មានបរិមាណឥណទាន ច្រើនជាងគេចំនួន ១១៩,០២១,៩៤៧ លានរៀល ស្មើនឹង ៥០% ដែលមានអ្នកខ្ចីប្រាក់សរុបចំនួន ៦៩.៦ម៉ឺននាក់។ បន្ទាប់មក គឺខេត្តកណ្តាល មានបរិមាណឥណទានចំនួន ១២.៦៩៧,៦៤៩ លានរៀល ស្មើនឹង ៥% មានអ្នកខ្ចីប្រាក់សរុបចំនួន ៣៩.៤ ម៉ឺននាក់។
ខេត្តសៀមរាប ជាខេត្តមានបរិមាណឥណទាន ខ្ពស់លំដាប់ទី៣ គឺប្រមាណ ១០,៣០៧,៣៥៨ លានរៀល ស្មើនឹង ៤% មានអ្នកខ្ចីប្រាក់សរុបចំនួន ៣២.៤ ម៉ឺននាក់។ ខេត្ត ដែលមានបរិមាណឥណទានទាបជាងគេ រួមមាន៖ ខេត្តមណ្ឌលគិរី ខេត្តប៉ៃលិន និង ខេត្តកែប។
តាមរបាយការណ៍ ខេត្តដែលមានអត្រានៃអ្នកសងត្រឡប់យឺតលើសពី៩០ថ្ងៃ ជាមធ្យម ៥.៧៣% មានដូចជា ខេត្តកំពង់ស្ពឺ (៦.៨៩%) ខេត្តកំពង់ធំ (៦.៦៨%) ខេត្តព្រះវិហារ (៦,០១%) ខេត្តព្រះសីហនុ (៥,៥៧%) និងខេត្តស្វាយរៀង (៣.៥១%)។ ខេត្តដែលមានអត្រានៃការសងត្រឡប់យឺតលើសពី៩០ថ្ងៃទាបជាងគេមាន ខេត្តស្វាយរៀង (៣.៥១%) ខេត្តព្រៃវែង (៤.៨៤%) ខេត្តតាកែវ (៥.០០%) ខេត្តកែប (៥.១១%) និងខេត្តកំពង់ចាម (៥.៤៥%)៕
