ក្នុងឱកាសអញ្ជើញជាអធិបតីកក្នុងពិធីបើកសិក្ខាសាលាស្តីពី “បរិវត្តកម្មប្រព័ន្ធបច្ចេកវិទ្យាឌីជីថល ក្រសួងមហាផ្ទៃ” នាព្រឹកថ្ងៃសុក្រ ទី០៤ ខែមេសា ឆ្នាំ២០២៥ ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានមានប្រសាសន៍លើកឡើងថា បរិវត្តកម្មឌីជីថល “Digital Transformation” គឺសំដៅលើរបត់នៃការផ្លាស់ប្តូររបៀបរបបនៃការរស់នៅ ការធ្វើការងារ និងការប្រាស្រ័យទាក់ទងគ្នា ការចរាចរណ៍ទិន្នន័យ ការកសាងហេដ្ឋារចនាសម្ព័ន្ធបណ្តាញ ការផ្លាស់ប្តូរឥរិយាបថ និងទម្រង់បែបផែនការងារគ្រប់វិស័យពីលក្ខណៈប្រពៃណី ទៅជាលក្ខណៈឌីជីថល ដែលជួយសម្រួលដល់ការរស់នៅរបស់ប្រជាពលរដ្ឋ ឱ្យកាន់តែប្រសើរឡើង។ 

ឯកឧត្តម ឧត្តមសេនីយ៍ឯកបន្តថា បច្ចុប្បន្នប្រព័ន្ធបច្ចេកវិទ្យា កំពុងមានការវិវត្តន៍ឥតឈប់ឈរ ដែលតម្រូវឱ្យអ្នកប្រើប្រាស់ត្រូវ សិក្សា និងស្វែងយល់នូវចំណេះដឹង និងត្រូវមានភាពប្រុងប្រយ័ត្នខ្ពស់ពីការវាយប្រហារ ឬលួចយក ព័ត៌មានបុគ្គលក្នុងគោលបំណងណាមួយ ដែលជាក់ស្តែងតាមបទពិសោធន៍កន្លងមកនៅក្នុងប្រទេសកម្ពុជាយើងបានជួបប្រទះនូវបទល្មើសបច្ចេកវិទ្យាមួយចំនួនរួមមាន៖ ការលួចកាន់កាប់គណនីបណ្តាញទំនាក់ទំនងសង្គម បទល្មើសហិរញ្ញវត្ថុ ការបង្ហោះអត្ថបទ ឬរូបភាពបរិហារកេរ្តិ៍ លើបណ្តាញទំនាក់ទំនងសង្គម ការបង្ហោះព័ត៌មានមិនពិត អំពើញុះញង់ និងបង្កចលាចលសង្គម ការជំរិតទារប្រាក់ ដោយបង្ហោះរូបភាពអាសអាភាស ការចម្លងមេរោគកុំព្យូទ័រ អាជីវកម្មរូបភាព ឬវីដេអូអាណាចារកុមារ ល្បែងភ្នាល់ ល្បែងកំសាន្ត អនឡាញខុសច្បាប់ ការវាយប្រហារជ្រៀតចូលប្រព័ន្ធកុំព្យូទ័រ ឬម៉ាស៊ីនមេ ជាដើម។ 

ឯកឧត្តម ឧត្តមសេនីយ៍ឯក អគ្គនាយក បានគូសបញ្ជាក់ជាថ្មីម្តងទៀតថា បរិវត្តកម្មឌីជីថល គឺជាការបញ្ជ្រាបចំណេះដឹងផ្នែកបច្ចេកវិទ្យា ការបង្កើនប្រសិទ្ធភាព នៃបទពិសោធន៍ក្នុងការប្រើប្រាស់ប្រព័ន្ធបច្ចេកវិទ្យាដូចជា ប្រព័ន្ធអ៊ីនធឺណិត និងទូរស័ព្ទឆ្លាតវៃ ការវិភាគទិន្នន័យ ដើម្បីស្វែងយល់ពីចំណុចជាយុទ្ធសាស្ត្រ ដែលអាចជំរុញការងាកមកនិយមប្រើប្រាស់ប្រព័ន្ធបច្ចេកវិទ្យាឌីជីថល និងការបង្កើនការយល់ដឹងរបស់ប្រជាជនឱ្យកាន់តែ យល់ច្បាស់ ពីគុណសម្បត្តិ និងគុណវិបត្តិនៃបច្ចេកវិទ្យាផងដែរ។ 

ឯកឧត្តម ឧត្តមសេនីយ៍ឯក បានបន្ថែមដែរ ថា បរិវត្តកម្មឌីជីថល “Digital Transformation” គឺជាការបង្កើតវប្បធម៌ដំណើរការ និង យុទ្ធសាស្ត្រ ដើម្បីធ្វើឱ្យសង្គមមួយមានភាពជឿនលឿន ស្របទៅនឹងភាពរីកចម្រើននៃយុគសម័យ សេដ្ឋកិច្ច និងសង្គមឌីជីថល៕