ចិន៖អាជ្ញាធរចិន បានដករដ្ឋមន្ត្រីការពារជាតិរបស់ខ្លួនចេញពីតំណែងកាលពីថ្ងៃអង្គារទី២៤ ខែតុលា ដែលជាកា​រទម្លាក់​មន្ត្រីជាន់ខ្ពស់លើកទីពីរក្នុងរយៈពេលបីខែ ដោយបង្កើតជាសំណួរអំពី​ស្ថិរភាពនៃ​ក្រុមដឹកនាំរបស់ប្រធានាធិបតី ស៊ី ជីនពីង ។

យោងតាមប្រព័ន្ធផ្សព្វផ្សាយរដ្ឋ ឧត្តមសេនីយ៍ លី ហ្សាំងហ្វូ ដែលបានបាត់មុខពីឆាកសាធារ​ណ​អស់​រយៈពេលពីរខែ ត្រូវបានបណ្តេញចេញពីតំណែងជារដ្ឋមន្ត្រីការពារជាតិ និងជាទីប្រឹក្សារដ្ឋ។ ចិនក៏បាន​ប្រកា​សផងដែរថា លោក ឈីន កាង ដែលត្រូវបានដកចេញពីតំ​ណែងជារដ្ឋមន្ត្រីការបរទេស កាលពីខែ​កក្កដា ត្រូវបានដកចេញពីតំណែងទីប្រឹក្សារដ្ឋផងដែរ។

សមាជិកសភាកំពូលរបស់ប្រទេសចិន គណៈកម្មាធិការអចិន្ត្រៃយ៍នៃសភាប្រជាជនជាតិ បានអនុម័តលើ​ការដកចេញពីបុរសទាំងពីរនាក់នេះ ដោយមិនបានផ្តល់ការពន្យល់ណាមួយឡើយ។ អ្នកជំនួសតំណែង​លោក លី មិនទាន់ត្រូវបានប្រកាសនោះទេ ដែលធ្វើឱ្យមហាយក្សនេះ គ្មានរដ្ឋមន្ត្រីការពារជាតិ ខណៈ​ដែ​លខ្លួនរៀបចំធ្វើជាម្ចាស់ផ្ទះទទួលមន្ត្រីការពារជាតិនៅឯវេទិកាសៀងសាន Xiangshan ទីក្រុងប៉េកាំង នៅថ្ងៃទី២៩ ដល់៣១ ខែតុលា។

សូមបញ្ជាក់ថា ថ្នាក់ដឹកនាំសំខាន់ៗនៃរដ្ឋាភិបាលចិនទាំង២រូបខាងលើ​កំពុងស្ថិតនៅក្រោម​ការស៊ើ​ប​អង្កេតសម្រាប់ការសង្ស័យថា មានអំពើពុករលួយទាក់ទងនឹងលទ្ធកម្មឧបករណ៍ និងការអភិវឌ្ឍ៕