(ប្រទេសហ្វីលីពីន)៖  លោក Manny Pacquiao នៅថ្ងៃអាទិត្យ ទី១៩ ខែកញ្ញាកន្លងទៅបានប្រកាសថា លោកនឹងឈរឈ្មោះជាប្រធានាធិបតីនៅឆ្នាំក្រោយ បន្ទាប់ពីលោកបាននិយាយរិះគន់អំពើពុករលួយរបស់រដ្ឋាភិបាល។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី១៩ ខែកញ្ញា ឆ្នាំ២០២១។

ចាប់តាំងពីខែមិថុនាមកលោក Manny Pacquiao  និងលោក Duterteបានប៉ះទង្គិចគ្នាជាសាធារណៈដោយប៉ាក់គីអាវរិះគន់គោលនយោបាយរបស់ប្រធានាធិបតីចំពោះប្រទេសចិននិងអំពើពុករលួយ។

លោក Manny Pacquiao បច្ចុប្បន្នជាសមាជិកព្រឹទ្ធសភាត្រូវបានជ្រើសរើសជាបេក្ខជនប្រធានាធិបតី ពីសំណាក់សម្ព័ន្ធមិត្តនយោបាយ នៃបក្ស PDP Laban របស់លោកនៅក្នុងសមាជរបស់បក្សនេះ ប៉ុន្មានថ្ងៃបន្ទាប់ពីបក្សគូប្រជែងដែលកំពុងកាន់អំណាចបានតែងតាំង លោក Duterte ជាជម្រើសសម្រាប់អនុប្រធានាធិបតី និងជំនួយការយូរអង្វែងរបស់លោក គឺសមាជិកព្រឹទ្ធសភាលោក Christopher "Bong" Go ជាបេក្ខជនប្រធានាធិបតីរបស់បក្ស។

លោក Pacquiao បាននិយាយនៅក្នុងព្រឹត្តិការណ៍នេះថា «ខ្ញុំជាអ្នកប្រដាល់ ហើយតែងតែជាអ្នកប្រដាល់ទាំងក្នុងនិងក្រៅសង្វៀន»។ ពេញមួយជីវិតរបស់ខ្ញុំ ខ្ញុំមិនបោះបង់ចោលការប្រយុទ្ធណាមួយឡើយ។ គ្មានអ្វីដែលមិនអាចទៅរួចទេ ប្រសិនបើវាត្រូវបានកំណត់ដោយព្រះ»។

សូមបញ្ជាក់ថា សេ្តចប្រដាល់ហ្វីលីពីនរូបនេះបានក្លាយជាសមាជិកព្រឹទ្ធសភាតាំងពីឆ្នាំ ២០១៦ ហើយក៏បានធ្វើជាសមាជិកសភាផងដែរ។ គាត់ធ្លាប់ជាសម្ព័ន្ធមិត្តដ៏ស្មោះត្រង់ចំពោះលោក Duterte ដោយការពារសង្គ្រាមគ្រឿងញៀនរបស់ប្រធានាធិបតីនិងការជំរុញទោសប្រហារជីវិត៕SP