ប៉េកាំង៖ បើតាមសារព័ត៌មាន South China Morning Post នៅថ្ងៃទី៣១ ខែមីនា ដែលបានស្រង់ប្រភពពីមន្រ្តីការទូតចិន លោក ស៊ី ជិនភីង នឹងធ្វើទស្សនកិច្ចនៅពាក់កណ្តាលខែមេសា ទៅកាន់វៀតណាម ម៉ាឡេស៊ី និងកម្ពុជា។ ប្រភពដដែលបានលើកឡើងថា ប្រធានាធិបតីចិន លោក ស៊ី ជិនភីង ត្រូវបានរៀបចំឱ្យបំពេញទស្សនកិច្ចនៅម៉ាឡេស៊ីរយៈពេល ៣ថ្ងៃ។ 

សូមបញ្ជាក់ថា សម្រាប់ដំណើរទស្សនកិច្ចទៅកាន់អាស៊ីអាគ្នេយ៍នាឆ្នាំនេះរបស់លោក ស៊ី ក្នុងគោលបំណងពង្រឹងទំនាក់ទំនងជាមួយប្រទេសជិតខាង ស្របពេលតំបន់អាស៊ីអាគ្នេយ៍កំពុងបារម្ភពីគោលនយោបាយការបរទេសរបស់អាម៉េរិកជុំវិញពន្ធគយ។

បច្ចុប្បន្ន ម៉ាឡេស៊ីបានកាន់តំណែងជាប្រធានអាស៊ាន ដោយប្រទេសនេះបានរក្សាទំនាក់ទំនងល្អជាមួយចិន ចំណែក វៀតណាមជាដៃគូពាណិជ្ជកម្មដ៏ធំបំផុតរបស់ចិនក្នុងអាស៊ាន រីឯកម្ពុជា គឺជាដៃគូពាណិជ្ជកម្ម អ្នកផ្តល់ជំនួយ និងអ្នកវិនិយោគដ៏សំខាន់សម្រាប់ចិន ដោយប្រទេសនេះបានចូលរួមនៅក្នុងគម្រោងហេដ្ឋារចនាសម្ព័ន្ធសំខាន់ៗនៅកម្ពុជាដូចជាផ្លូវថ្នល់ ស្ពាន កំពង់ផែ និងអាកាសយានដ្ឋានជាដើម៕