ភ្នំពេញ  ៖ ក្រសួងប្រៃសណីយ៍ និងទូរគមនាគមន៍សហការជាមួយសហភាពសហព័ន្ធយុវជនកម្ពុជា  បន្តផ្តល់ជូនការប្រើប្រាស់សេវាអ៊ីនធឺណិតល្បឿនលឿន ដោយឥតគិតថ្លៃ ក្រោយព្រឹត្តការណ៍អង្គរសង្ក្រាន្ត បានបញ្ចប់ដោយជោគជ័យ។

តាមរយ:គេហទំព័រហ្វេសប៊ុក  របស់  ក្រសួងប្រៃសណីយ៍ នាថ្ងៃទី១៧  មេសា  នេះ  ថា  "ដោយមើលឃើញពីតម្រូវការនៃការប្រើប្រាស់អ៊ីនធឺណិតរបស់ភ្ញៀវទេសចរណ៍ជាតិ និងអន្តរជាតិនៅខេត្តសៀមរាប និងការសាទរពីសាធារណជនចំពោះ WiFi  សាធារណ:  ក្រសួងប្រៃសណីយ៍និងទូរគមនាគមន៍  សហការជាមួយសហភាពសហព័ន្ធយុវជនកម្ពុជា  បន្តផ្តល់ជូនការប្រើប្រាស់សេវាអ៊ីនធឺណិតល្បឿនលឿនដោយឥតគិតថ្លៃ ក្រោយព្រឹត្តការណ៍អង្គរសង្ក្រាន្តបានបញ្ចប់ដោយជោគជ័យ"។ 

ក្រសួង  បន្ដថា  សូមភ្ញៀវទេសចរជាតិ និងអន្តរជាតិ ស្វែងរកទីតាំង  WiFi សាធារណៈ ទាំង ១៦ តាមតំណភ្ជាប់  ឬ ស្កេន QR Code ក្នុងរូបខាងក្រោម ឬផ្ទាំងបង្ហាញនៅតាមទីតាំងជាក់ស្តែង ដែលបានកំណត់ ដើម្បីភ្ជាប់ WiFi។ តំណភ្ជាប់ទីតាំង WiFi សាធារណ:  https://mptc.gov.kh/public-wifi។ 

សូមរំលឹកថា  រយៈពេល០៣ថ្ងៃ នៃព្រឹត្តិការណ៍អង្គរសង្ក្រាន្ត  នៅខេត្តសៀមរាប  ពីថ្ងៃទី១៤-១៦ ខែ មេសា ឆ្នាំ២០២៣ មានភ្ញៀវទេសចរជាតិ-ភ្ញៀវទេសចរបរទេស និងប្អូនប្រជាពលរដ្ឋដើរកម្សាន្តមានចំនួនប្រមាណ ២ ១២០ ៣៧៣នាក់ ក្នុងនោះ ភ្ញៀវទេសចរជាតិ និងបងប្អូនប្រជាពលរដ្ឋ មានចំនួនប្រមាណ ២ ១០៧០០០នាក់៕