ម៉ិកស៊ិក៖ អាជ្ញាធរម៉ិកស៊ិកបានជួយសង្គ្រោះជនបរទេស ២២ នាក់ កាលពីថ្ងៃអង្គារ ដែលភាគច្រើនជាជនជាតិគុយបានិងហៃទី ដែលត្រូវបានចាប់ជំរិតនៅពេលថ្ងៃដែលខ្មាន់កាំភ្លើងបានសម្រុកចូលសណ្ឋាគារមួយនៅភាគកណ្តាលរដ្ឋ San Luis Potosi ។

ខ្មាន់កាំភ្លើងក៏បានចាប់ជំរិតជនជាតិម៉ិកស៊ិក ១៦ នាក់ ផងដែរ នៅពេលដែលពួកគេបានវាយឆ្មក់ចូលសណ្ឋាគារ ឈ្មោះ Sol y Luna ក្នុងទីក្រុង Matehuala ចម្ងាយប្រហែល ១៩៥ គីឡូម៉ែត្រ (១២០ ម៉ាយល៍) ភាគខាងជើងនៃទីក្រុង San Luis Potosi ដែលជារដ្ឋធានីក្នុងតំបន់។

យ៉ាងណាម៉ិញ ជនជាតិម៉ិកស៊ិកត្រូវបានដោះលែងមុន ប៉ុន្តែជនបរទេសទាំងនោះត្រូវតែទៅជួយសង្គ្រោះនៅតំបន់ដាច់ស្រយាលមួយនៅតាមផ្លូវរវាង Matehuala និងរដ្ឋធានីក្នុងតំបន់ Arturo Garza Herrera នេះបើយោងតាមអគ្គរដ្ឋអាជ្ញាបាននិយាយនៅក្នុងសេចក្តីថ្លែងការណ៍មួយ។

ជាក់ស្តែង ជនបរទេសទាំងនោះត្រូវបានបញ្ជូនទៅទីក្រុង San Luis Potosi ដើម្បីទទួលបានអាហារនិងជំនួយពីគ្រូពេទ្យ។ ការិយាល័យរបស់ហ្គាហ្សាមិនបានផ្តល់ព័ត៌មានលម្អិតអំពីការជួយសង្គ្រោះឬនិយាយថាតើជនបរទេសណាម្នាក់បានរងរបួសនោះទេ។

ស្របពេលជាមួយគ្នានេះ ការិយាល័យរបស់ហ្គាហ្សាបាននិយាយនៅក្នុងសេចក្តីថ្លែងការណ៍មួយថា ជនបរទេសដែលត្រូវបានជួយសង្គ្រោះភាគច្រើនជាជនជាតិហៃទីនិងគុយបា។ 

គួររំលឹកថា នៅមុននេះ ក៏មានសេចក្តីរាយការណ៍ថា ជនជាតិវេណេស៊ុយអេឡាខ្លះស្ថិតនៅក្នុងចំណោមពួកគេផងដែរ។ អនីតិជន ៣ នាក់ និងស្ត្រីមានផ្ទៃពោះម្នាក់ ក៏ស្ថិតក្នុងចំណោមពួកគេដូចគ្នាដែរ។ NR