ភ្នំពេញ ៖ មន្រ្តីនគរបាលចរាចរណ៍ នៅផ្លូវជាតិលេខ៣ ត្រូវបានព្រមានជាលាយលក្ខណ៍អក្សរលើកទី១ ចំនួន ០៤នាក់ និងអប់រំ ធ្វើកិច្ចសន្យាចំនួន ០៣នាក់ ហើយដាក់ឲ្យអនុវត្តវិន័យរយៈពេល ០៣ខែ នៅការិយាល័យបុគ្គលិក។

យោងតាមសេចក្តីបំភ្លឺព័ត៌មាន របស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល ជម្រាបជូនសាធារណជន និងបណ្តាញសារព័ត៌មានមេត្តាជ្រាបថា ការផ្សាយក្នុងគណនីហ្វេសប៊ុកឈ្មោះ Lay Kongkea ដែលបានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក នៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល នៅរសៀលម៉ោង១៤.០០នាទីថ្ងៃខែដដែល ក្រុមការងារថ្នាក់ស្នងការដ្ឋាននគរបាលខេត្ត បានធ្វើការស្រាវជ្រាវបឋម។

លុះព្រឹកថ្ងៃទី០៣ ខែមេសា ឆ្នាំ២០២៥ ការិយាល័យបុគ្គលិក នៃស្នងការដ្ឋាននគរបាលខេត្តកណ្តាល បានកោះហៅកងកម្លាំងនគរបាលចរាចរណ៍ផ្លូវគោកចំនួន០៧នាក់ ឲ្យចូលខ្លួនមកបំភ្លឺ ពាក់ព័ន្ធហេតុការណ៍ដែលបានកើតឡើងខាងលើនេះ។

ក្រោយពីសាកសួរ និងឆ្លើយបំភ្លឺរួច មន្រ្តីនគរបាលចរាចរណ៍ដែលមានការពាក់ព័ន្ធក្នុងហេតុការណ៍ខាងលើ ត្រូវបានព្រមានជាលាយលក្ខណ៍អក្សរលើកទី១ ចំនួន ០៤នាក់ និងអប់រំ ធ្វើកិច្ចសន្យាចំនួន ០៣នាក់ ហើយដាក់ឲ្យអនុវត្តវិន័យរយៈពេល ០៣ខែ នៅការិយាល័យបុគ្គលិក។

សូមជម្រាបថា មានរថយន្ត ០២គ្រឿងបុកគ្នាពីក្រោយ ដោយសារមាន នគរបាលចរាចរណ៍ ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោកចេញមកស្ទាក់ បណ្តាលអោយកើតមានគ្រោះថ្នាក់ចរាចរណ៍តែម្តង ខណៈដែលកើតមានរឿងភ្លាមៗ កម្លាំងនគរបាលចាប់ផ្តើមរើបារ៉ាស់ ដោយមិនទាន់ចប់ម៉ោងការងារចេញទៅបាត់តែម្តង ។

ហេតុការណ៍នេះកើតឡើងនៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ។

បើតាមការបញ្ជាក់ពីពលរដ្ឋ ដែលបង្ហោះវីដេអូនោះ បានលើកឡើងថា មូលហេតុមុនកើតមានគ្រោះថ្នាក់ចរាចរណ៍ គឺ មន្ត្រីនគរបាលចរាចរណ៍ ដែលឈរពួនស្ទាក់នៅផ្លូវជាតិលេខ៣ បានស្ទុះចេញមកឃាត់រថយន្តម៉ាកហ្វ៊ត ពណ៌ខ្មៅមួយគ្រឿង ដែលកំពុងបើកបរត្រឹមត្រូវតាមល្បឿនកំណត់ ពេលនោះ ម្ចាស់រថយន្តក៏បានជាន់ហ្វ្រាំងភ្លាមៗ ស្រាប់តែមានរថយន្ដមួយគ្រឿងទៀត បើកមកបុករថយន្តម៉ាកហ្វ៊ត ពីក្រោយ ។ នៅពេលឃើញហេតុការណ៍គ្រោះថ្នាក់ចរាចរណ៍បែបនេះ កម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះ មិនបាន ចុះវាស់វែងដើម្បីរកដំណោះស្រាយអោយប្រជាពលរដ្ឋទេ បែរជានាំគ្នារើបារ៉ាស ហើតបើករថយន្តគេចចេញពីគោលដៅអស់តែម្ដង៕