ភ្នំពេញ ៖  លោកស្រី ចន និម្មល រដ្ឋមន្ត្រីក្រសួងពាណិជ្ជកម្ម បានពន្យល់បន្ថែមថា ធម្មតាការដំឡើងពន្ធ ធ្វើឲ្យទំនិញឡើងថ្លៃ ដូច្នេះប៉ះពាល់ដល់អ្នកបញ្ជាទិញ ដែលជាប្រជាជនអាមេរិករងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗដូចជាវាយណភណ្ឌ និងសំលៀកបំពាក់។

នៅក្នុងកិច្ចសម្ភាសន៍ពិសេសមួយបង្ហោះនៅលើបណ្ដាញសង្គមសម្ដេចបវរធិបតីហ៊ុន ម៉ាណែត នាថ្ងៃទី៣ មីនា ២០២៥ លោកស្រី ចន និម្មល បានឲ្យដឹងថា កម្ពុជាគោរពតាមបទដ្ឋានរបស់អង្គការពាណិជ្ជកម្មពិភពលោក ម៉្លោះហើយកម្ពុជាមិនបានកំណត់យកពន្ធនាំចូលលើទំនិញរបស់សហរដ្ឋអាមេរិក ៩៧%នោះឡើយ។

ជញ្ជីងពាណិជ្ជកម្មរវាងកម្ពុជានិងអាមេរិក ដែលទំហំពាណិជ្ជកម្មជិត៣០០លានដុល្លារ របស់អាមេរិកបាននាំចូលមកកម្ពុជា គឺពន្ធនាំចូលលើទំនិញខ្ពស់បំផុតត្រឹមតែ២៩%ប៉ុណ្ណោះ ដូច្នេះស្ថិតនៅក្រោមបន្ទាត់កំណត់ខ្ពស់បំផុតរបស់អង្គការពាណិជ្ជកម្មពិភពលោក៣៥%។

ហេតុអ្វីបានជាអាមេរិកដំឡើងពន្ធរហូតដល់ទៅ៤៩% ដែលការកំណត់ពន្ធនេះកម្ពុជាខ្ពស់ជាងគេ? លោកជំទាវ បានពន្យល់ថា ដោយសារតែប្រទេសកម្ពុជាដូចជាប្រទេសកំពុងអភិវឌ្ឍផ្សេងៗទៀត។ ច្បាស់ណាស់អាមេរិកមានប្រជាជនប្រមាណជា៣៤០លាននាក់ ខណៈកម្ពុជាមានប្រជាជនប្រមាណជា១៧លាននាក់ គឺសហរដ្ឋអាមេរិកបានក្លាយជាទីផ្សារស្រូបទាញផលិតផលកម្ពុជាច្រើន ខណៈកម្ពុជាបញ្ជាទិញតិច។ ការបញ្ជាទិញច្រើនសបញ្ជាក់ឲ្យឃើញថាកម្ពុជាមានសមត្ថភាពខ្ពស់នៅក្នុងការផលិត ដែលទីផ្សារនៅសហរដ្ឋអាមេរិក ឬសហគមន៍អឺរ៉ុបក្ដី។

សំណួរជាបន្ដសួរថាតើការដំឡើងពន្ធ៤៩% របស់អាមេរិកលើប្រទេសកម្ពុជា តើប៉ះពាល់កម្ពុជាដែរទេ? ច្បាស់ណាស់ការដំឡើងពន្ធនេះធ្វើឲ្យប៉ះពាល់ដល់ប្រទេសកម្ពុជា។ ប៉ុន្ដែអ្នកប៉ះពាល់ដំបូងគេ គឺអ្នកបញ្ជាទិញ (អាមេរិក) និងអ្នកផលិត (កម្ពុជា) ។ នេះជាការលើកឡើងរបស់លោកស្រី ចន និមល រដ្ឋមន្រ្តីក្រសួងពាណិជ្ជកម្ម បានផ្ដល់កិច្ចសម្ភាសន៍ពិសេសជាមួយស្ថានីយ៍ទូរទស្សន៍ ទ.ទ.ក នៅយប់ថ្ងៃទី៣ ខែមេសា ឆ្នាំ២០២៥។

លោកស្រី ចន និម្មល ពន្យល់បន្ថែមថា «ធម្មតាការដំឡើងពន្ធ ធ្វើឲ្យទំនិញឡើងថ្លៃ ដូច្នេះប៉ះពាល់ដល់អ្នកបញ្ជាទិញ ដែលជាប្រជាជនអាមេរិករងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗដូចជាវាយណភណ្ឌ និងសំលៀកបំពាក់»។

ទោះបីជាយ៉ាងណាក៏ដោយ លោកស្រី ចន និម្មល បានអំពាវនាវដល់បងប្អូនប្រជាពលរដ្ឋកុំមានការព្រួយបារម្ភ ហើយការងារនេះរាជរដ្ឋាភិបាលបានយកចិត្តទុកដាក់ខ្ពស់ដើម្បីដោះស្រាយ? បញ្ហាទាំងនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវវិធានការជាបន្ទាន់ ឲ្យ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដែលជាប្រធានគោលនយោបាយនិងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូលដាក់ជូនសម្ដេច ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជា។

សូមបញ្ជាក់ថា នៅព្រឹកថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសា នៅសហរដ្ឋអាមេរិក លោក ដូណាល់ ត្រាំ បានសម្រេចកំណត់ពន្ធគយលើទំនិញនាំចូលពីកម្ពុជាប្រមាណ៤៩% ដែលកម្រិតខ្ពស់មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។ បើតាមលោកត្រាំ ការដំឡើងពន្ធនេះ នឹងចូលជាធរមាននៅថ្ងៃទី៩ ខែមេសា ឆ្នាំ២០២៥ខាងមុខនេះ៕